1967ನೇ ಇಸವಿ ನವರಾತ್ರಿಯ ಪರ್ವಕಾಲದಲ್ಲಿ ಉದಯವಾದ ಈ ನಮ್ಮ ಸಂಸ್ಥೆಯು ಪ್ರಾರಂಭದಲ್ಲಿ ಉರ್ವ ಚಿಲಿಂಬಿಯ “ಗುರುಕೃಪಾ” ವಠಾರದಲ್ಲಿ ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಅಭಿಮನ್ಯು ಶಾಖೆಯ ಮೂಲಕ ಅಸ್ತಿತ್ವಕ್ಕೆ ಬಂತು. ಶಾಖೆಗೆ ಬರುವ ಹಲವು ಕಿರಿಯ ಮಕ್ಕಳು ಸೇರಿಕೊಂಡು ಶ್ರೀ ಶಾರದಾ ಮಾತೆಯನ್ನು ಆರಾಧಿಸಿಕೊಂಡು ಬರುವ ದಿವ್ಯ ಇರಾದೆಯೊಂದಿಗೆ ಆರಂಭವಾದ ಈ ಸಂಸ್ಥೆ ಗುರುಕೃಪಾ ಕಂಪೌಂಡಿನ ಹಟ್ಟಿಯಲ್ಲಿ ಜನ್ಮ ತಾಳಿತು. ಇದು ಆಗಿನ ಮಕ್ಕಳಲ್ಲಿ ಹುದುಗಿರುವ ಶ್ರದ್ಧಾ ಭಕ್ತಿಗೆ ಸಾಕ್ಷಿಯಾಯಿತು, ಆರಂಭದಲ್ಲಿ ಶ್ರೀ ಶಾರದಾ ಮಾತೆಯ ಪೊಟೋವನ್ನಿಟ್ಟು ಪೂಜಾ ಕೈಂಕರ್ಯವನ್ನು ಮಾಡಿಕೊಂಡು ಆರಾಧಿಸಿದ ಆ ಕಿರಿಯ ಮಕ್ಕಳಲ್ಲಿ ಭಕ್ತಿಯನ್ನು ಹುರಿದುಂಬಿಸಲಾಯಿತು. ದೇವರ ನಾಮಗಳ ಪಾರಾಯಣ, ಭಜನಾ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡು ವಿದ್ಯೆಯ ಆಧಿನಾಯಕಿ ಶಾರದಾ ಮಾತೆಯನ್ನು ಆರಾಧಿಸಲಾರಂಭಿಸಿದರು. ಚಿಕ್ಕ ಮಕ್ಕಳ ಈ ಶ್ರದ್ಧಾಭಕ್ತಿಗೆ ಬೆನ್ನೆಲುಬಾಗಿ ನಿಂತವರು ಸ್ಥಳೀಯ ಹಿರಿಯರು, ಮಕ್ಕಳು ಸರಿಯಾದ ದಾರಿಯಲ್ಲಿ ಮುನ್ನಡೆಯಲು ಪ್ರೇರಕ ಶಕ್ತಿಯಾದರು.

ಹಿರಿಯರ ನಿರಂತರ ಪ್ರೋತ್ಸಾಹ, ಬೆಂಬಲದೊಂದಿಗೆ ಚಿಲಿಂಬಿಯಲ್ಲಿ ಶ್ರೀ ಶಾರದಾ ಮಾತೆಯ ದಿವ್ಯ ಮೂರ್ತಿಯನ್ನು ಪ್ರತಿಷ್ಠಾಪಿಸಿ ಶಾರದಾ ದೇವಿಯ ಆರಾಧನೆಯನ್ನು ನವರಾತ್ರಿಯ ವೇಳೆಯಲ್ಲಿ ಹಮ್ಮಿಕೊಳ್ಳಲಾಯಿತು. ಹಿರಯರ ಸಲಹೆಯಂತೆ ಚಿಕ್ಕ ಮಕ್ಕಳು ಪ್ರಾರಂಭಿಸಿದ ಶಾರದಾ ದೇವಿಯ ಆರಾಧನೆಯನ್ನು “ ಬಾಲಕರ ಶಾರದೆ” ಎಂದು ಹೆಸರಿಸಲಾಯಿತು. ಈ ನಿಟ್ಟಿನಲ್ಲಿ ವಿವಿಧ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲು, ಬಾಲಕರ ಸಾರ್ವಜನಿಕ ಶ್ರೀಶಾರದಾ ಮಹೋತ್ಸವ ಸಮಿತಿ”ಯನ್ನು ರಚಿಸಲಾಯಿತು. ನೂರಾರು ಹಿರಿಯ ಕಿರಿಯ ಸದಸ್ಯರನ್ನು ಹೊಂದಿದ ಈ ಸಮಿತಿ ಮುಂದಕ್ಕೆ ಒಂದು ಶಕ್ತಿಯಾಗಿ ಬೆಳೆದು ನಿಂತು ಒಂದು ಸಂಸ್ಥೆಯಾಗಿ ರೂಪುಗೊಂಡು, ಹತ್ತು ಹಲವು ಕಾರ್ಯಕ್ರಮವನ್ನು ಹಮ್ಮಿಕೊಂಡು ಭಗವದ್ಭಕ್ತರಲ್ಲಿ ವಿದ್ಯೆ, ಶ್ರದ್ಧಾಭಕ್ತಿ ಬೆಳೆಸುವಲ್ಲಿ ಯಶಸ್ಸು ಪಡೆಯಿತು.

ಹೃದಯ ಭಾಗದಲ್ಲಿ ತಲೆಎತ್ತಿ ನಿಂತಿರುವ ಶ್ರೀ ಶಾರದಾ ನಿಕೇತನ ಸಂಸ್ಥೆಯ, ನಮ್ಮ ಕೆಲಸ ಕಾರ್ಯಗಳನ್ನು ಗಮನಿಸಿದ ದಾನಿಗಳು ಶಾರದಾ ದೇವಿಯ ಆರಾಧನೆಗೆಂದು 2 1/2 ಸೆಂಟ್ಸ್ ಸ್ಥಳವನ್ನು ದಾನಮಾಡಿ ಇಲ್ಲಿ ಭವ್ಯವಾದ ಕಟ್ಟಡ ನಿರ್ಮಾಣಮಾಡಲು ನೆರವಾದರು. 1996ರಲ್ಲಿ ಶಂಕು ಸ್ಥಾಪನೆಗೊಂಡ ಈ ಕಟ್ಟಡವು ಊರ ಪರವೂರ ದಾನಿಗಳ ನೆರವಿನಿಂದ ಬಹು ಬೇಗ ನಿರ್ಮಾಣವಾಗಿ ಹತ್ತು ಹಲವು ಕಾರ್ಯಕ್ರಮಗಳ ಅನಾವರಣಕ್ಕೆ ಸಾಕ್ಷಿಯಾಯಿತು.
ಇನ್ನು ನಾವು ಶಾರದಾ ನಿಕೇತನ ಕಟ್ಟಡದ ಉದ್ಘಾಟನಾ ಕಾರ್ಯಕ್ರಮಕ್ಕೆ ಶ್ರೀಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿಗಳಾದ ಶ್ರೀ ವೀರೇಂದ್ರ ಹೆಗ್ಗಡೆಯವರು ಆಗಮಿಸಿ ಕಟ್ಟಡದ ಉದ್ಘಾಟನೆಯನ್ನು ನೆರವೇರಿಸಿ ತಮ್ಮ ಸಂತಸ ವ್ಯಕ್ತಪಡಿಸಿದ ಗಳಿಗೆಯಂತೂ ನಮಗೆ ಚಿರಸ್ಮರಣೀಯವಾಗಿದೆ. ಉದ್ಘಾಟನ ಭಾಷಣದಲ್ಲಿ ಧರ್ಮಾಧಿಕಾರಿಗಳು ನೀಡಿದ ಸಲಹೆ ನಾವು ಅಕ್ಷರಶಃ ಪಾಲಿಸಿದ ಹೆಮ್ಮೆ ನಮಗಿದೆ. ಈ ಸಂಸ್ಥೆ ಬಾಲಕರ ಸಂಸ್ಥೆ. ಶ್ರೀ ಶಾರದಾ ಪೂಜೆ ಬಾಲಕರಿಂದ ಆರಂಭವಾಗಿದೆ. ಇದರ ಎಲ್ಲಾ ಕೆಲಸ ಕಾರ್ಯಗಳನ್ನು ಬಾಲಕರೇ ನಡೆಸಿಕೊಂಡು ಬರುತ್ತಾರೆ. ಆದುದರಿಂದ ನೀವೆಲ್ಲರೂ ಕೂಡ ಮಕ್ಕಳಿಗೆ ಬೇಕಾದಂತಹ ಇದರ ಅಭಿವೃದ್ದಿಗೆ, ಅವರ ಉನ್ನಿತಿಗಾಗಿ ಅವಶ್ಯಕತೆಯುಳ್ಳ ವಿದ್ಯಾಕೇಂದ್ರವನ್ನು ಸ್ಥಾಪಿಸಬೇಕು. ಆ ನಿಟ್ಟಿನಲ್ಲಿ ತಾವು ಈ ಕಟ್ಟಡವನ್ನು ಸದುಪಯೋಗಿಸಬೇಕೆಂದು ಸಲಹೆ ನೀಡಿದ್ದರು. ಧರ್ಮಾಧಿಕಾರಿಗಳ ಸಲಹೆಯಿಂದ ಪ್ರೇರಿತರಾದ ನಾವು ಆಸುಪಾಸಿನ ಪುಟ್ಟ ಮಕ್ಕಳು ನರ್ಸರಿ, ಕೆ.ಜಿ ಕ್ಲಾಸುಗಳಿಗೆ ದೂರದ ಶಾಲೆಗಳಿಗೆ, ಪ್ರಯಾಣಿಸುವುದನ್ನು ಅವರ ತಂದೆ ತಾಯಿಗಳು ಪಡುವ ಕಷ್ಟವನ್ನು ಗಮನಿಸಿ ಈ ಬಗ್ಗೆ ಕೂಲಂಕುಷವಾಗಿ ಚರ್ಚಿಸಿ 1998ರ ಎಪ್ರಿಲ್ ತಿಂಗಳಲ್ಲಿ ಶ್ರೀಶಾರದಾ ವಿದ್ಯಾನಿಕೇತನ ನರ್ಸರಿ ಶಾಲೆಯನ್ನು ಆರಂಭಿಸಿದೆವು.

ಹೀಗೆ ಶಾರದಾ ಮಾತೆಯ ಕಟ್ಟಡದಲ್ಲಿ ನಿತ್ಯ ವಿದ್ಯಾಭ್ಯಾಸ ನೀಡುವ ಕೆಲಸ ಆರಂಭವಾಯಿತು. ಊರವರ ಮುಕ್ತ ಪ್ರೋತ್ಸಾಹ, ಉತ್ತೇಜನದಿಂದಾಗಿ ಹಾಗೂ ಇಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಅಧ್ಯಾಪಕರುಗಳ ನಿಸ್ವಾರ್ಥ ಸೇವೆಯಿಂದಾಗಿ ಈ ವಿದ್ಯಾಸಂಸ್ಥೆಗೆ ಒಳ್ಳೆಯ ಹೆಸರು ಬಂದಿದೆ. ಈ ಶಾಲೆಯಲ್ಲಿ ವಿದ್ಯಾರ್ಥಿಗಳಿಗೆ ಪಾಠದ ಜೊತೆಗೆ ಪಾಠೇತರ ಚಟುವಟಿಕೆಗಳಲ್ಲಿ ಪ್ರೋತ್ಸಾಹಿಸಿ ಅವರಲ್ಲಿ ಆತ್ಮವಿಶ್ವಾಸ ಮೂಡಿಸುವ ಕೆಲಸ ನಮ್ಮ ಅಧ್ಯಾಪಕರಿಂದ ನಿತ್ಯ ನಡೆಯುತ್ತದೆ. ಯೋಗಾಭ್ಯಾಸ, ನೃತ್ಯ, ದೇವರ ನಾಮಗಳು, ಕ್ರೀಡೆಗೆ ಪ್ರೋತ್ಸಾಹ ನೀಡಲಾಗುತ್ತಿದೆ. ಅದಲ್ಲದೆ ಎಳವೆಯಲ್ಲಿಯೇ ದೇಶಪ್ರೇಮವನ್ನು ಮೂಡಿಸುವ ಉದ್ದೇಶದಿಂದ ಸ್ವಾತಂತ್ರ್ಯ ಹೋರಾಟಗಾರರು, ಹಿರಿಯ ನಾಯಕರುಗಳ ಬಗ್ಗೆ ಅರಿವು ಮೂಡಿಸಲಾಗುತ್ತದೆ. ಎಲ್ಲಾ ಜಾತಿಬಾಂಧವರ ಹಬ್ಬಗಳನ್ನು ಆಚರಿಸುವುದರೊಂದಿಗೆ ಹಬ್ಬಗಳ ಮಹತ್ವವನ್ನು ತಿಳಿಸಲಾಗುತ್ತದೆ. ನವರಾತ್ರಿ ದಿನಗಳಂದು ಶಾಲೆಯ ವಾರ್ಷಿಕೋತ್ಸವವನ್ನು ಏರ್ಪಡಿಸಿ. ಮಕ್ಕಳ ಪ್ರತಿಭಾ ಪ್ರದರ್ಶನವನ್ನು ಅನಾವರಣ ಮಾಡಲಾಗುತ್ತದೆ.

ಹೀಗೆ ಈ ಭಾಗದಲ್ಲಿ ಒಂದು ರೀತಿಯ ಮೌಲ್ಯಯುತ ಜೀವನ ನಡೆಸುವ ಬಗ್ಗೆ ಸಚ್ಚಾರಿತ್ರವನ್ನು ಪ್ರೋತ್ಸಾಹಿಸಿ ಬೆಂಬಲಿಸುವ ಕೆಲಸವನ್ನು ನಾವು ನಿರಂತರ ಮಾಡುತ್ತಿದ್ದೇವೆ.ನಂತರದ ದಿನಗಳಲ್ಲಿ ಒಂದು ಟ್ರಸ್ಟನ್ನು ರಚಿಸಿ ಮಹಿಳೆಯರ ಕೌಶಲ್ಯ ಶಕ್ತಿಯನ್ನು, ಸಂಘಟನಾ ಶಕ್ತಿಯನ್ನು ಪ್ರೇರೇಪಿಸಲು ಶ್ರೀಶಾರದಾ ಮಹಿಳಾ ಮಂಡಳಿಯನ್ನು ಕೂಡಾ ಆರಂಭಿಸಲಾಯಿತು. ಹಿರಿಯರ ಸಲಹಾ ಸಮಿತಿಯನ್ನು ರಚಿಸಲಾಯಿತು. 1998ನೇ ಜನವರಿ 25ರಂದು ಶಾರದಾ ನಿಕೇತನ ಕಟ್ಟಡದಲ್ಲಿ ಶ್ರೀ ಶಾರದಾ ಮಹಿಳಾ ಮಂಡಳಿಯು ಶ್ರೀಮತಿ ಎಂ ಸಾವಿತ್ರಿ ವಿಠ್ಠಲ್ ರಾವ್ ರವರಿಂದ ಉದ್ಘಾಟನೆಗೊಂಡು ಅಸ್ತಿತ್ವಕ್ಕೆ ಬಂತು. ಶ್ರೀ ಶಾರದಾ ಮಹಿಳಾ ಮಂಡಳಿಯು ಪ್ರತಿ ವರ್ಷ ಆಧ್ಯಾತ್ಮಿಕ, ಸಾಂಸ್ಕøತಿಕ ಮತ್ತು ಸಮಾಜಮುಖಿ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುವುದರ ಮೂಲಕ ಹಲವಾರು ಆರೋಗ್ಯ ಸಂಬಂಧಿ ಶಿಬಿರ, ಯೋಗ ಶಿಬಿರ, ನೇತ್ರ ತಪಾಸಣೆ ಶಿಬಿರಗಳನ್ನು ನಡೆಸುತ್ತಾ ಬಂದಿದೆ. ಮಹಿಳೆಯರು ಸ್ವಾವಲಂಬಿಗಳಾಗಿ ಸ್ವದ್ಯೋಗಸ್ಥರಾಗುವಂತೆ ಉಚಿತ ಲಘು ಕೌಶಲ್ಯ ಆಧಾರಿತ ಕ್ಯಾಂಡಲ್ ತಯಾರಿಕೆ, ಸೋಪ್ ತಯಾರಿಕೆ, ಸೌಂದರ್ಯ ಪ್ರಸಾದನ, ಕೃತಕ ಆಭರಣ ತಯಾರಿಕೆ, ಹೊಲಿಗೆ ತರಬೇತಿ ಇದೇ ಮೊದಲಾದ ವೃತ್ತಿಪರ ತರಬೇತಿ ಶಿಬಿರಗಳನ್ನು ಆಯೋಜಿಸಲಾಗಿದೆ. ಚಿಲಿಂಬಿ ಮತ್ತು ಸುತ್ತಮುತ್ತಲಿನ ಹಲವಾರು ಮಹಿಳೆಯರು ಇದರ ಪ್ರಯೋಜನ ಪಡೆದಿದ್ದಾರೆ. ಇದು ಮಂಡಳಿಯ ಹೆಗ್ಗಳಿಕೆ.

ನಮ್ಮ ಮಂಡಳಿಯು 2002ರಲ್ಲಿ ನೋಂದಣಿಗೊಂಡು ಅದೇ ವರ್ಷದಲ್ಲಿ ತಾಲೂಕು ಮಹಿಳಾ ಮಂಡಲ ಒಕ್ಕೂಟದ ವಾರ್ಷಿಕ ಸಮಾರಂಭದಲ್ಲಿ ಪಾಲ್ಗೊಂಡಿರುವರು. ಮಂಡಳಿಯು ಸತತವಾಗಿ 25 ವರ್ಷಗಳ ದೀರ್ಘ ಕಾಲದ ಸಾಮಾಜಿಕ ಹಾಗೂ ಆಧ್ಯಾತ್ಮಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡು ಬಂದಿದ್ದು ಪ್ರಸಕ್ತ 26ನೇ ವರ್ಷಕ್ಕೆ ಕಾಲಿಟ್ಟಿದೆ.ಸಂಘದ ಸದಸ್ಯರು ಪ್ರತಿ ವರ್ಷ ನಮ್ಮ ಪರಿಸರದ ಹಲವಾರು ಅನಾಥಾಶ್ರಮಗಳಿಗೆ ಭೇಟಿ ನೀಡುವುದರೊಂದಿಗೆ ಅನಾಥರಿಗೆ ಸಾಂತ್ವನ ತುಂಬುವ ಪ್ರಯತ್ನವನ್ನು ಮಾಡುತ್ತಾ ಬಂದಿದ್ದೇವೆ. ಈ ನಿಟ್ಟಿನಲ್ಲಿ ಶಾರದಾ ಮಹಿಳಾ ಮಂಡಳಿಯು ಆದರ್ಶಪ್ರಾಯ ಸಂಸ್ಥೆ ಎಂಬ ಹೆಗ್ಗಳಿಕೆಯನ್ನು ಪಡೆದಿದೆ. ನಿರಂತರವಾಗಿ ವಿವಿಧ ಜನಸ್ನೇಹಿ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡು ಶ್ರೀ ಶಾರದಾ ದೇವಿಯ ನಿರಂತರ ಆರಾಧನೆ ಮಾಡಿಕೊಂಡು ಬರುವ ನಮ್ಮ ಸಮಿತಿಯು ಸುವರ್ಣ ವರ್ಷಕ್ಕೆ ಪಾದಾರ್ಪಣೆ ಮಾಡಿರುವುದು ಸ್ಮರಣೀಯ ಸಂಗತಿ. ನಮ್ಮ ಸಮಿತಿಯ ಹತ್ತು ಹಲವು ಕಾರ್ಯಕ್ರಮಗಳಿಗೆ ಹಿರಿಯ, ಕಿರಿಯ ಸದಸ್ಯರುಗಳ ಪಾಲುಗೊಳ್ಳುವಿಕೆಯು ಸೇರಿದಂತೆ ಶ್ರೀ ಶಾರದಾ ದೇವಿಯ ಎಲ್ಲಾ ಕೆಲಸ ಕಾರ್ಯಗಳಲ್ಲಿ ಶ್ರಮವಹಿಸಿ ದುಡಿದು ಯಶಸ್ಸಿಗೆ ಕಾರಣವಾಗಿರುತ್ತಾರೆ. ಅವರ ನಿಸ್ವಾರ್ಥ ಶ್ರದ್ಧಾ ಭಕ್ತಿಯ ಸೇವೆಯನ್ನು ಅತ್ಯಂತ ಗೌರವದಿಂದ ಈ ಸಂದರ್ಭದಲ್ಲಿ ಸ್ಮರಿಸುತ್ತಿದ್ದೇವೆ.ನಮ್ಮ ಯೋಚನೆಗಳು, ಯೋಜನೆಗಳನ್ನು ಕಾರ್ಯ ರೂಪಕ್ಕೆ ತರುವಲ್ಲಿ ಹತ್ತು ಹಲವು ಮಹನೀಯರ ಬೆಂಬಲ, ಪ್ರೋತ್ಸಾ ಹವನ್ನು ಸ್ಮರಿಸುತ್ತಾ ಅವರಿಗೆ ತಾಯಿ ಸರಸ್ವತಿ ಮಾತೆ ಸನ್ ಮಂಗಳವನ್ನು ಮಾಡಿ ಹರಸಲೆಂದು ಪ್ರಾರ್ಥಿಸುತ್ತೇವೆ.ಐವತ್ತು ವರ್ಷಗಳಲ್ಲಿ ನಾವು ಸಾಗಿ ಬಂದ ಹಾದಿ ಬಲು ಕಠಿಣವಾದರೂ, ಅದನ್ನು ಯಶಸ್ಸಿನೆಡೆಗೆ ಸಾಗಿಸುವಲ್ಲಿ ಆ ಮಹಾಮಾತೆಯ ಆಶೀರ್ವಾದದ ಬಲವೇ ಕಾರಣವಾಗಿದೆ. ನಿಮ್ಮ ಬೆಂಬಲ ಪ್ರೋತ್ಸಾಹ, ಆಶೀರ್ವಾದಗಳು ನಮ್ಮ ಸಂಸ್ಥೆಗೆ ಸದಾ ಇರಲಿ ಎಂಬ ಪ್ರಾರ್ಥನೆಯೊಂದಿಗೆ ಬಾಲಕರ ಸಾರ್ವಜನಿಕ ಶ್ರೀ ಶಾರದಾ ಮಹೋತ್ಸವ ಟ್ರಸ್ಟ್ ಸಮಿತಿ(ರಿ.)